【Made in HK】「納雜」網店主打本土貨　推動婦女就業　烏龍茶本地菜最好賣

作者 : NGAD 1月 25, 2021

疫情下零售業經歷寒冬，實體店紛紛結業，另一邊廂，網購平台越開越多，生意如日方中。於大埔起家的「納雜」，由4位20多歲的年輕人主理，以推動婦女就業為公司理念，不主打日韓零食，反而主打本地製造產品，希望推動本地農產及工業發展；又為當區居民度身訂造「連唐樓都送貨上門」、「即日派送」的貼心服務，成功殺出一條血路。

「納雜」位於唐樓的工作室，牆身塗上一片靜謐的藍，令堆在電腦桌前、黃黑色包裝的口罩更為顯眼。訪問期間，小房間內傳來嬉笑聲，一個小男孩奪門而出，手中握著一塊「口水肩」，工作室的負責人隨即叮囑他要慢慢走，不要橫衝亂撞。

「佢係喺呢度工作嘅婦女嘅小朋友，平時媽媽忙緊，佢就會自己玩玩具。」「納雜」的其中一位創辦人Agnes說。

「納雜」的創辦理念之一是推動婦女就業，這個念頭來自另一位創辦人Jason。25歲的Jason，於公司的工作T-Shirt外，穿了一件啡色間條布恤衫，架着一副大方框眼鏡，打扮入時。他憶述，早年於英國攻讀國際關係碩士學位時，曾參與一個比賽，當時提出了以釋放婦女勞動力為概念的計劃：「我嗰時嘅idea係起一間托兒所，請一啲本身有小朋友嘅婦女，佢哋喺嗰度做嘢嘅時候，既可以湊人哋個仔，又可以湊自己個仔。依家係將呢個idea，a kind of shift 咗過嚟呢到。」

回流香港後，Jason曾擔任廣告顧問，月入3萬。反送中運動發生後，他在社交平台，結識了幾位同是土生土長的大埔人，傾談間開始形成「納雜」的雛形：

我哋嗰時思考，除咗街頭抗爭，食黃店，仲有乜可以做到。我哋又想推動大家去消費真正made in Hong Kong 嘅product，所以就有咁嘅念頭，而起步點就喺大埔。

去年10月，4人開始討論公司理念、方向，正想落手準備，卻又遇上中大理大事件及疫情。計劃終擱置到今年6月才實行，4人共投資約30萬，租下一個約600呎的唐樓單位，為了節省成本，又合手合腳自己把原裝的僱傭中心重新裝修，搬家俬、上漆，樣樣親力親為。

「納雜」的工作室空間有限，故現時只能聘請一位婦女，每星期大概工作五天，負責包裝蔬菜、送貨、簡單整理貨品等工作。繁忙時間，她有時也要幫忙送一、兩單貨，幼稚園中班的兒子則交由工作室裏的同事代為看管。能帶同兒子一起上班，讓她能照顧兒子的同時，亦可幫補家計。「其實婦女反而更有優勢，佢哋打理家頭細務、包裝、整理貨品呢啲嘢，比起我哋年輕人更井井有條。」Agnes笑說。

開業三個月，最令Agnes感觸的故事，原來同樣與一對母子有關：「我哋之前有賣口罩，有個大肚婆話就嚟到預產期，驚等唔切我哋派貨。於是我哋就將上一批有淨嘅貨俾咗佢，但係因為大埔嗰時疫情好嚴重，佢去咗將軍澳嗰邊暫住，我哋就安排同事照去送貨，又送咗張心意卡祝佢哋母子平安。」客人後來在社交網站撰文分享「好人好事」，又親自向他們道謝，令Agnes感動不已：

雖然係好小事，但依家諗返都覺得係幾開心，好似同人真係有互動，唔單只係一門生意、一單買賣咁簡單。

集合本地製造品牌　一站式消費

根據政府統計處數字，今年3月份零售業總銷貨價值，較去年同期大跌46.7%。不過，港人對網上購物的需求卻顯著提升，Visa香港公布今年上半年電子商務交易量數字，顯示面對面交易中的非接觸式交易量（如八達通、Apple Pay），由疫情前的五成，增至現時的七成。網購市場潛力無窮，而各式各樣的網購平台，今年更是如雨後春筍般湧現。6月才面世的「納雜」，能站得住腳，自有過人之處。

「我哋嘅網站設計靚、簡潔囉！哈哈！」Jason笑道。「講真嘅，比起其他平台可能會主打日、韓、台貨品，我哋反而係主打本地製造，呢個係我哋推廣嘅理念，亦都係我哋嘅賣點。」Jason自信地說。「納雜」選擇上架的貨品、合作的品牌，除了是「黃店」，大部分更是本地製造，真正「本地薑」。

雖然依家本地品牌越來越多，但宣傳渠道比較散。我哋希望人哋可以透過「納雜」，知道晒香港有咩本土嘅品牌，甚至將來遊客都可以一站式買晒所有「Made in Hong Kong」嘅貨品，唔駛行勻全香港先搵到。

現時「納雜」有約150種貨品，與超過10間本地品牌達成合作關係，6間仍在洽商中。貨品價格由10多元到數百元不等，大米醬油、蕃薯菜芯以至寵物零食，只要本地品牌願意授權寄賣，他們都樂意上架。

百多種貨品中，僅「金鳳香米」、台灣鴨血以及咖啡豆並非香港製造，不過，Agnes補充咖啡豆是在香港炒製的。

我哋嘅貨品豐儉由人，開門七件事有齊哂，就真係一個超級市場一樣。最希望係有個平台，比人清晰一眼睇哂有乜本土品牌可以買。

工作室的其中一個貨架，放滿了本地品牌的手工啤酒，足足有十多款，Jason不禁笑說：「淨係睇呢面牆，真係成個酒吧咁！」

作為大埔起家的品牌，幾位創辦人對該區的居民需求熟悉不過。「大埔有好多村屋、唐樓，好多網購平台都唔肯送到門口，甚至唔肯送入村。」對「納雜」來說，大埔沒有所謂偏遠地區，只要消費夠250元，25公斤的白米也能直送門口。眾人商討時又認為，區內運貨距離短、需時少，遂試行即日送貨，早上11點前下單，便能即日派送。「打破咗運貨要2－5日嘅規限，增加我哋嘅優勢。」Agnes說。

「納雜」暫不設門市，今個星期起送貨範圍會由大埔區，伸延到上水、粉嶺、沙田及大圍，同樣有「送入村」的服務。

「納雜」主要以社交網站、通訊軟件宣傳，每當有新貨推出，會即時通知舊客，吸引客人回頭消費；又與合作品牌互相宣傳，達致協同效應。眾多貨品中，銷量最好的竟是烏龍茶及本地有機蔬菜包。前者銷量有近1000枝，後者營業額累計達4萬元，以每斤約47元計，相等於840斤的有機菜。

Jason說，此銷量是意料之外：「始終大部分香港人對本地菜冇乜認識，加上大埔嘅街市非常方便，一開始都會驚無人買。但係經過Pop up store 、網絡宣傳後，結果出到嚟都算理想。」

現時「納雜」的專頁已有4000多人追蹤，每日營業額約2000元，扣除每月一萬多元租金、聘請司機及婦女、入貨等成本，九月這個月剛好收支平衡。公司逐步走上軌道，Jason遂辭去原有工作，與另外2位創辦人全職打理「納雜」。坐在一旁，原本不作聲的Wayne尷尬地道：「得我仲有返全職囉。」其他人紛紛笑著附和：「靠佢做資金來源㗎啦！」